مخ مبیو چا ۔۔۔!!

یلے کسل کن، متوئی می تملو یود "نتی سکت پو نتی ہرتخنو ان"۔ "ندانگ" زیرسنا ندانگ پو کھوانگ نتی کھڑق نہ روسپو مین، اونہ، دو نتی غدونگ بزو، سکت پو، گونچس نہ دوک لنگسی لس کن ان۔ یو ژوخ ژوخ یودا ندانگ شربہ ان، میدا ندانگ شرگو ان، ہرتخ مید، چھہ مید ان۔

ہرتخ مید نہ نومہ زینی دی ٹھوپ نمزینگ نو "ندانگ پو یا" زیرے نتی پھایول نا پھسکدی ہرتخ ہرتون، جیوخ نہ بیورکن، رگل پھی وخ نمزہ نہ یا تسی بیتھپ کنی ہرتخنہ نہ چھدکھونگ ژلے، تھوسے تھسے، خسوسے نہ کولے، پھسقپہ نہ سترونگمی ڈرل ڈرپ بین یود پونگئی مخ نہ رن بے رگوسپہ یود۔

یا وخ مین، ہرتخ مین نہ چنگ مین تس پوبینگ نو "شربہ نا انو" زیرے دوکذو مید پہ یا شربی نوزین نہ نونلوکھ سی پھری بیاتھپ سونگپھو سونگپھو بین ہورلنگ کھورنگ کانککول لسپہ لا کھورین یود پی بونینگ نہ بو چک نتی شگری "علی محمد خالص" ان۔

یا ہرژوم کن کھوری کسل ان ۔۔۔۔!

ستروق ہرژی کھہ نری تھونگنہ رگی یا ژے می جیکھ پا

دیو مید پی نری یا تمی دو تھونگسے ایشن جیکھس

سنا لا میکو کھن مانگمو میگی تھونگسے مہ جیکھ پھن

سنو لا نری کوین دوکسے می کو تھونگسے ایشن جیکھس

ہمبو یود نہ یا، بولوکھ نہ لم ہلتنی عود پو سننگ نہ کھوقپینگ نو شرے یود نرے یا، دومید نہ کانگمہ لقپہ چن می چی ہرکونے یود۔ یو نہ تھیسے، لس پو نہ لقشیس پو کھوری "ہلم کھن" دوکپہ، اونہ کھوری پھیاقپوبی ہلم تل پو بہ ڑگیل بیسے پھاسکدی خسمبونگ پھالوی پھیانگ نہ پھیانگ تل بہ ژوخ بیسے تل بی بزو زیرس نا، نا ژوخ کھیے مید کن لا، دے خسیرہ گنگسے یود پی کھوقلوکھ سی خوم لا تھونمی جیوخ نہ دوغے گانہ کھیونگس۔ خسمبینگ خسیرہ، سننگینگ نو یا شربی ہرتخنہ نہ چھدکھونگنی ہرژونگ لوکھ نا یر تراغی مے خسوسے، کھوانگ پولا دی خش ترود مید شل میدپی می ژھوبی سی رن مخ مہ بیاس نہ سی، شرگوبہ، بوسمید نہ بڑوسمید شیسے خسمبہ نہ تھونگ تھونگئی چوڑا تھونے یود کھن کنی سی چی مہ ہرژس بیاس نہ سی، کھوری یا ڑگیانگ چھنی کھرکھر کھربو بینگ نو ٹھم ٹھمی کھا دوکسے نہ خسمبی غبیل پو سنا بیاکھن ژا مین، کوکھن نہ، ژھور شنگ بیاکھن نہ مخ رن بیاکھنی سننگ لا ژھا لوپ اونگ مہ بیاسے تھون چوکپی جیوخ پو یا خالص کھورینگ یود پی بزو کھوری ژوخپو یانگ سوئینگ چھمسے مید۔

خالص، انمو نہ مینگ بیونگ ہرژوم کھن پہ ان، اما دقسن تھون تھون، کھو نہ توتی ہرژوم کھن ہرکونے یود نہ سی، ناژوخ کھا میجاق بقچی گی کھودی مینگ نہ زینگئی پھری کھور نہ می دھم کننگ سکت زیربا مید۔

یا یدانگی کھوری ہرژوم چیگی تم ژھیری جیوخ پو لا چک سنانہ بیوس۔

رگہ ستونگ لہ مجیکھس، نا نری ہلتو تھونگسے ایشین جیکھس

ہلتا ہلتو لا نری گو تھورو ذگو تھونگسے ایشن جیکھس

نا رگے سماغی ڑگیامژھو لہ مہ جیکھس چھوربہ سہ لانگسے

نری بزلفہ می کھور بی سینگئی ہرکو تھونگسے ایشن جیکھس

یو ژوخپو یانگ مل ژھیے لا ہلتوس۔۔۔

تھد چوکپھی پھیا یری سننگ، یود ستروق لہ نی سترینو گوینگ،

یانگ تھدنا نانگ تھدوکپہ، نری ستروق لہ گوے سترینو لا ۔۔۔۔!!

بل نمزہ تھدکھی نین غذیر، رگوے کھا مپھوقپہ خالص،

نا لوقسے گیگ تا بڑق ہرژسے، چھود سننگ غدیانگئی ریگولا

یا دوانہ ۔۔۔۔

گاسہ یلے یود کھن لا می جیکھ پھن پا نا خالص

ہلتو لزا یلے یود پی نری رگو تھونگسے ایشن جیکھس

یلے کسل کن، دیو نا لا نری دے شنگمیدی سنانوئینگ نو کھٹ پھو یو ان۔ نیا کھیے مید کن نام کھوری شیدا متھون نہ متھون، تھون نرے کھوری خسیرری مل انمی ہرژوم کن لا سنا بیا تھدے گوے ان۔

خالص پو نہ انمو یا مینگپو کھوانگ سہ گارنگڑیا پھاسکدی مینگ مین، یود لا "گانگڑگیہ" زیربو انپہ، اونہ، ندی شربی گوے ھی تھود، اتی یولی چو، راجہ صبا ئی پھیاقپو سی کھوری گانگڑگیہ پھاسکدی تم ژھیرکننگ نو ھرقق سے یود پی ہرژوم کن نہ تھیسے تخ پھی خچس میننگ ان سوک۔

کھوری پھیاقپو بی ہرژوم کننگ نو ژوخسکار (تشبیح)، تمسکار نہ تم لزب (قافیہ ردیف)، تمبیول (استعارہ)، اوکھن (طنز، کنایہ)، ہلتن لوکھ (اشارہ)، ہرمنگ گو (تلمیح) دوانہ اے پھڑومہ چک ہرژوم جیوخسی لس کھونگ سینگ یا پھسکدی کنڈیری مید پہ اے سکد چیگی ہڑکھیمہ بیسے زیرے مید۔

نا یا درینگی ہرمنگ نہ ہرمنگ سی "تم گو" نہ تھیسے، خالص کھوری لس شیس نہ، خسمبی غبیل نا، سینگئی کس ژھڑانگ نہ، میگ ژھیلی خلو، بوگاخ نہ ہرژوم لوکھ سی لسنہ چیکتو لا سننگئی ہرژا نہ اجوو ژھیرنگمو زیرید، نا لہ یو خسمید دی شنگٹھوپ سونگپھی شربہ لا تہ سوئی تس چی لا یری مخ گیگ، دو مید نہ سا، یا گوبود ہرژا بود مرمق پوبی رول لا نہ پھسکد پھایولی ہرتخ نہ نوزن تھل چوکپہ، ہرژونگما نہ عر لوقپہ پھاری بین یود پی یری روخ پھڑیو لا جوو زیرید۔ چی چھدکھہ یا چھقپو تم سنونی رولتری شربہ چکتو سی یانگ لا سنا بیسے یری تھونمو خسمبونگ میولیینگ نو پھاسکد کوکھن چی رگو چکتو تھون چوکپہ پھری چنگ گل گل چی بیا لدن نرے۔

شگرینگ نو چاھہ چنگ یول پو کھوانگ یا تملوکھ نہ شنگ سری ملسہ سونگسے رگاشہ چن چمادینگ نہ خالص ژھونژے سونگسے می ہرژے انا، اما اینے یول کھورینگ نہ یا ہرژوم لوکھسی جیوخ یود کھن جمادی رگا تھونگید، اے سناڈیانگ می ژھو لا کھترانگ پو سہ اوکھن کوید دونگ لا نا چی زیر ۔۔۔۔۔!!!

مے خسوس لا خشی تنگ سے نری روسپی چھولوق پو

ننژے شیسے شید، ہرژخسنہ سی ایسمن بیسے ہرژوقپو ۔۔۔ !